四川好靚，山水好秀麗，但係好鬼唔方便同難去，我不得不承認呢次四川行比以前咁多旅行都更艱苦，更多阻滯，新疆絲路都相對變成 easy  trip。有意挑戰自己o既 bottom line 可以去四川試下 :p

今次我地去左21日，都係洗左6-7千包機票)，差唔多去晒成個四川架啦。交通方面香港直飛成都來回 $2300 到啦，搭公巴穿越各個主要景點大約$100(坐足8-12個鐘架!)，住同食好平，每人$80-$100一日(講晒價兼激慳!)。

九寨溝
交：成都>九寨溝 新南門公巴每人$105
　　溝內巴士 + 門票 每人$205 (學生價, 求其有張乜大library card就得架啦)
宿：溝內無住宿，偷住樹正寨人家每人$20(無沖涼水，衛生ok)

九寨溝梗係靚啦，睇相咪知囉 !!!
建議大家搭車去到最高，行棧道返落黎，大約一日半，景致更好 :)

黃龍
交：九寨溝> 川主寺＞黃龍 　包的士每人$60
　　黃龍>川主寺 公巴每人$15
宿：公車站隔離d酒店 每房$120
飛：黃龍$80

九寨溝去黃龍只係3個鐘車，沿途風景好靚架。建議住宿中途站川主寺，d酒店平d，食野又方便，唔洗係黃龍比人掠水。
可惜去黃龍個日落毛毛雨，睇唔到遠處o既雪寶頂。

黃龍 -- 四姑娘山
交：川主寺＞映秀 　公巴每人$65 (真係local 人搭o既公車，幾污糟下)
　　映秀>四姑娘山日隆鎮      包面包車每車$200
宿：日隆d酒店 每房$120
飛：長坪溝$35 ，騎馬$200(騎足8個鐘!!!)

可惜去四姑娘山天陰陰，睇唔到個雪山山頂，只係去左長坪溝騎左成日馬，o個到都幾靚，我地去到最入係木樏子草坪，係day trip最入o既景點。

丹巴(想去)
交：四姑娘山日隆鎮 >丹巴     包面包車每車$200
宿：小金縣電訊賓館 每房$100

第二日係四姑娘山落大雨大雪九月初咋)，無得去雙橋溝，唯有改plan去丹巴，但係條路實在太差，勁”lum” 山泥，去到某個位仲有mud slide，等左五個鐘都未得(但係之前已勁整左成朝)，唯有折返小金搭第二朝車去成都，點知小金竟然全市停水咁都得？個城都幾大下架，小金個政府諗乜？d人點生活？)，於是我地經歷左一晚比香港掣水更慳水o既一晚。

海螺溝
交：小金>成都    公車$50 (架車好好好污糟，d local人勁無品，唔開窗食煙都算啦，吐痰落車地下，
　　當地下係垃圾桶，最勁係有細路係車上小便!!!!!)
　　成都 >海螺溝磨西鎮　公車$100
飛：海螺溝+車$70+$50
　　吊車 $140        
宿：磨西鎮公車站招待所 $60一房
　　海螺溝銀川大酒店 $160一房(無熱水沖涼，有熱水就$240)
　　磨西鎮長征大酒店$180 一房(靚酒店，o岩香港人 :p)

海螺溝真係好掂，四面都係雪山，前面係冰川，最好彩係個日天氣好好，睇得好清楚。睇完冰川我地仲去左二號營地浸溫泉，個溫泉好靚好乾淨。

第二日我地騎馬去左傳說中o既燕子溝，但係其實個到無野睇，亦都去唔到裡面睇冰川(未起好)。不過在此提醒各位自由行人士，如果有位叫陳國君o既人係海螺溝”漏”你去燕子溝就唔好理佢，因為佢係騙子，會老屈兼恐嚇遊客，切忌上當。

康定
交：海螺溝磨西鎮> 康定　包的士$150
　　康定> 木格錯        包的士$250(來回)
宿：交通賓館$150一房 (所謂全城最好酒店，d熱水唔掂，難沖涼)
　　泰寧賓館$100一房 (唔錯，服務好)

康定係個幾靚o既城市仔，幾有特色，天氣穩定。木格錯去左，但係無咩睇，相都費時post。

稻城
交：康定 > 稻城  公車$125 
宿：汽車站招待所$50一房 (無水無電!唔知有乜囉!)

去完康定我地搭左程好鬼辛苦下o既車，如果你去完九寨溝覺得程車算辛苦，咁你千祈唔好去稻城，因為辛苦過九寨溝成倍，坐足12-14個鐘，條路超”dang”，我成日連人帶凳墊一齊飛起，返香港唔洗玩過山車，因為已經“玩”得太多。但係程車經過o既地方非常之靚，香格里拉feel，咁都算值得o既。

講起稻城我就三把火，話晒稻城都算出名，去到個城全城停電停水又係個句，當地d人點生活？)，跟住仲落成晚大雨大雪，令我地被迫放棄最想去o既亞丁，因為個到祇可以露營，但係落晒雪得零度仲點露營呀？想肺炎咩？

樂山，峨媚
交：康定>成都> 樂山  公車$100     
宿：樂山紅利來賓館$100一房 (樂山d酒店都係殘殘地又貴，不過有得沖涼)

樂山大彿都幾宏偉架，有成十機層樓高(74米)。至於峨媚山我地上到一半落大雨，所以無上金頂。

成都單車美食遊
交：峨媚>成都>  公車$35
　　交通賓館租單車 $15一日(抵!) 
宿：交通賓館 $80 一房(公共衛生間, 都幾乾淨)

只要你夠膽，係大陸d城市踩單車好鬼刺激架，d人車爭路場面好玩過 playstation，極度考驗你o既單車技術。
我地參觀左武候祠同青羊宮，都幾得意架。另外我地仲食左好多野，成都各樣出名小食都食晒咁濟。